குணமா வாய்ல சொல்லுங்க... வீடியோ பண்ணாதீங்க!' பெற்றோர்களை எச்சரிக்கும் உளவியல்.

சில தினங்களாக வாட்ஸ்அப்பில் வைரலாக வலம் வருகிறது அந்த வீடியோ. அம்மா ஒருவர் தன் மகளிடம் சேட்டை செய்தால் அடி விழும் என்கிறார். அதற்கு அந்தச் சிறுமி, 'சேட்டைப் பண்ணினா அடிக்கக் கூடாது; திட்டக் கூடாது. குணமா வாயால் சொல்லணும்' என அழுதபடியே சொல்கிறாள். இப்படி ஒரு தடவையல்ல, பல தடவை அந்த சிறுமி தன் வயதுக்கே உரிய அப்பாவித்தனத்துடன் தன் அம்மாவிடம் சொல்கிறாள். அந்த வீடியோவில் முகம் காட்டாத சிறுமியின் அம்மாவைப் போலவே, வீடியோவைப் பார்க்கும் எல்லோருமே ரசித்துச் சிரிக்கிறார்கள். சில மாதங்களுக்கு முன்பும், இதேபோல ஒரு அம்மா-குழந்தை வீடியோ வைரலானது. அதில், 'உன் அக்காவைத்தான் நிறைய பிடிக்கும்' என விளையாட்டாகச் சொல்லும் அம்மாவிடம், 'அப்போ என் மேலே பாசம் இல்லையா' என மழலையில் கேட்டபடியே அழுகிறது குழந்தை. இதுபோல குழந்தைகளை அழவைக்கும் வீடியோக்கள், இணையத்தில் கொட்டிக்கிடக்கின்றன. இந்த வீடியோக்களில் வரும் அம்மாக்களுக்குத் தாங்கள் செய்வது சும்மா விளையாட்டுக்கு என்பது நன்குத் தெரியும். ஆனால், குழந்தைகளுக்கு?
இப்படிக் குழந்தைகளை அழவைத்து வீடியோ எடுப்பது சரியா? இந்த மாதிரியான செயல் குழந்தைகளை எப்படியெல்லாம் பாதிக்கும்? என்ன சொல்கிறார், உளவியல் நிபுணர் ஷாலினி.

``தங்கள் குழந்தையைச் சீண்டிவிட்டு, அது ரசிக்கும்படி ஏதாவது செய்வதை வீடியோ பதிவுசெய்து வாட்ஸ்அப்பில் வெளியிடுவது இப்போது பிரபலமாகி வருகிறது. இதில் அம்மாக்களும் விதிவிலக்கில்லை. இதைக் கொஞ்சம் உளவியல்ரீதியில் அணுக வேண்டும். குழந்தைகளுடனான உறவில், மற்றவர்களைவிட தனக்கு இயல்பாகவே அதிக உரிமை இருப்பதாக அம்மாக்கள் நினைக்கிறார்கள். அதனால்தான், தனக்குப் பிடித்ததையெல்லாம் பிள்ளைகளின் மேல் திணிப்பது காலங்காலமாக நடந்து வருகிறது. அதில் ஒன்றாகத்தான் நான் இந்த வீடியோவையும் பார்க்கிறேன்.

ஆனால், குழந்தையின் பலவீனத்தையோ, அதன் பிரியத்தையோ தன் பொழுதுபோக்குக்காக அம்மா பயன்படுத்துவது நிச்சயம் தவறுதான். இப்படி, தன்னை வீடியோவில் பதிவுசெய்வதற்காக, சும்மா விளையாட்டுக்குத்தான் அம்மா சீண்டுகிறார் என்பது அந்தக் குழந்தைக்குத் தெரியாது அல்லவா? அம்மா சீண்டும்போது, அந்தக் குழந்தை என்ன நினைக்கும் தெரியுமா? நிஜமாகவே அம்மாவுக்குத் தன்னைப் பிடிக்கவில்லை. அதனால்தான் இப்படி மிரட்டுகிறார், கோபப்படுகிறார் என்று நினைக்கும். அந்த நினைப்பு அந்தக் குழந்தைக்குள் ஒருவித பயத்தை உண்டாக்கும். அதனால், மனம் உடைந்துபோகும்; இந்த வீடியோ நிகழ்வு முடிந்த பின்பும் குழந்தை கவலைப்பட்டு அழலாம்; எல்லாவற்றுக்கும் மேல் அம்மா தன்னைவிட்டுவிட்டுப் போய்விடுவாளோ என்ற நினைப்பில் பாதுகாப்பின்மையாக உணரும்.

ஒரு சாதாரண விளையாட்டு விஷயத்தில் இவ்வளவு தூரம் யோசிப்பது சரியா என நினைக்க வேண்டாம். குழந்தைகளின் மனம் அப்படிப்பட்டது. உங்களின் தற்காலிக கேளிக்கைக்காக, ஒரு குழந்தையின் மன உணர்வுகளோடு விளையாடுவதும் உணர்ச்சி துஷ்பிரயோகமே ( psychological abuse). இது சட்டப்படி தண்டனைக்குரிய குற்றம் என்பதையும் தெரிந்துகொள்ளுங்கள் பெற்றோரே. ஆங்கிலத்தில், With great power comes greater responsibility என்றொரு பொன்மொழி இருக்கிறது. 'அம்மாவாக இருப்பது பெரும் அதிகாரம். அதனால், தாய்மார்கள் அதிக தார்மீக பொறுப்புடன் நடந்துகொள்வது அவசியம்' என்பது இதன் பொருள். ஆகவே, டெக்னாலிஜிக்கும் லைக்குக்கும் ஆசைப்பட்டுப் பொறுப்பை மறந்துவிடாதீர்கள்'' என்கிறார் ஷாலினி.
Share on Google Plus
முக்கிய குறிப்பு: மக்கள் நண்பன் இணையதளத்திற்கு பல்வேறு ஊடகவியலாளர்களால், வாசகர்களால் மற்றும் அரசில்வாதிகளின் ஊடக இணைப்பாளர்களால் செய்திகள் மற்றும் தகவல்கள் அனுப்பி வைக்கப்படுகின்றன இவ்வாறு அனுப்பி வைக்கப்படும் செய்திகளுக்கு மற்றும் தகவல்களுக்கு மக்கள் நண்பன் நிர்வாகமோ அல்லது அதன் ஆசிரியர் குழுவோ எந்தவிதத்திலும் பொறுப்பாக மாட்டார்கள். செய்திகளை அனுப்பி வைப்போர் நாகரீகமற்ற மற்றும் பிறர் மனதை புண்படுத்தகூடிய கருத்துகளை / செய்திகளை தவிர்க்கும்படி கேட்டுக்கொள்கிறோம். கடுமையான கருத்துக்கள் மற்றும் பிழையான செய்திகள் குறித்து எங்கள் கவனத்திற்கு கொண்டு வந்தால் அவற்றை பாரபட்சமின்றி நீக்க நடவடிக்கை எடுக்கப்படும். இவ்வாறான செய்திகள் தொடர்பாக எங்களுக்கு தெரியப்படுத்த info@makkalnanbannews.com என்ற மின்னஞ்சலை தொடர்பு கொள்ளலாம்.

0 comments:

Post a Comment